పోలీస్ యూనిఫాంలో గంగూలీ... అసలేంటీ కథ!

భారత క్రికెట్ దిగ్గజం సౌరభ్ గంగూలీ సినీ రంగ ప్రవేశం చేస్తున్నాడా? అంటూ అభిమానుల్లో నెలకొన్న సందేహాలకు నెట్ ఫ్లిక్స్ తెరదించింది. ఖాకీ: ది బెంగాల్ చాప్టర్-2 అనే వెబ్ సిరీస్ పోస్టర్లలో గంగూలీ పోలీస్ యూనిఫాంలో కనిపించడంతో అభిమానులు ఆశ్చర్యపోయారు. దాంతో ఊహాగానాలు జోరందుకున్నాయి.

అయితే ఈ ఊహాగానాలకు ఫుల్ స్టాప్ పెడుతూ, నెట్ ఫ్లిక్స్ స్పష్టత ఇచ్చింది. ఈ మేరకు సోషల్ మీడియాలో వీడియో పంచుకుంది. ఈ వీడియోను బట్టి... గంగూలీ ఈ వెబ్ సిరీస్ లో నటించడంలేదని, కేవలం ప్రమోషన్ లో మాత్రమే భాగం పంచుకున్నాడని స్పష్టమైంది. మొత్తమ్మీద ఈ ప్రమోషన్ వీడియో గంగూలీ అభిమానులను విశేషంగా అలరిస్తుందనడంలో సందేహం లేదు. 

బెంగాల్ చాప్టర్ వెబ్ సిరీస్.... 'ఖాకీ: ది బీహార్ చాప్టర్'కు సీక్వెల్ గా వస్తోంది. ఐపీఎస్ అధికారి అమిత్ లోథా జీవితంలోని నిజ సంఘటనల ఆధారంగా 'బీహార్ చాప్టర్' గతంలో విడుదలై సంచలనం సృష్టించింది. ఇప్పుడు 'బెంగాల్ చాప్టర్' కూడా అదే స్థాయిలో ప్రేక్షకులను మెప్పిస్తుందా లేదా అనేది చూడాలి.